Tuesday, July 15, 2008

بلادي


بلادي أنـــــــــــا
اســـــــــماعيل حسن

بلادي أنا بلاد ناسا في أول شي ..
مواريثم كتاب الله
وخيل مشدود، وسيف مسنون حداه درع
تقاقيبن تسرج الليل مع الحيران
وشيخا في الخلاوي ورع
وكم نخلات تهبهب في جروفا الساب
وبقرة حلوبة تتضرّع وليها ضرع
بلادي أنا

بلادي سهول ، بلادي حقول
بلادي الجنة للشافوها
ولى البرّة بيها سمع
بلادي بلد ناساً تكرم الضيف
وحتى الطير يجيها جعان ومن أطراف تكيها شبع
تشيل الناس ، كل الناس وساع بي خيرو لينا يسع
وتتدفق مياه النيل على الخيران
بياض الفضة في وهج الهجير بيشع
بلادي الصفقة والطنبور وداراتن تنح بالليل
وبنوتن تحاكي الخيل
يشابن زي جدي الريل
شبالن مكنتل فوق طريفو ودع
بلادي بلاد من التاريخ
من ترهاقا لاعند ميسنا
وحتى الجاي خيل ودروع
بلادي أمان ، بلادي حنان وناسا حُنان
يكفكفوا دمعة المفجوع
يحبو الدار يموتو عشان حقوق الجار
يخوضو النار فحال فد دمعة
كيف لوشافوها سايله دموع
ويبدّوا الغير على زاتن
يقسموا اللقمة بيناتن
ويدّوا الزاد حتن كان مصيرن جوع
يضوقوا النار عشان فد دمعة
وكيف الحال لو شافوها سايلة دموع!
ديل أهلي .. واللــــــــــه ديل أهلي
البقيف في الدارة
في وسط الدارة
وأقول لي الدنيا. كل الدنيا ديل أهلي
عرب ممزوجة بي دم الزنوج الحارّة
ديل أهلي ..
ديل قبيلتي
لمّن أدور أفصل للبدور فصلي
ديل فصلي
أقول بعضي
ألاقيهم تسرّبوا في مسارب الروح
بقوا كلي
ألاقي قلبي والإحساس
وسافر في بحار شوقم زمــــان عقلي
أنا محل قبّلت ألقاهم معاي ، معاي زي ضليّ
أنا لو ما جيت من زي ديل كان وا أسافاي ، وا مأساتي وا زّلي
تصوّر كيف يكون الحال لو ما كنت سوداني
وأهل الحارّة ما أهلي تصوّر

1 Comments:

Blogger ahmed said...

http://services-area.com/%d8%b4%d8%b1%d9%83%d8%a9-%d9%85%d9%83%d8%a7%d9%81%d8%ad%d8%a9-%d8%ad%d8%b4%d8%b1%d8%a7%d8%aa-%d8%a8%d8%a7%d9%84%d9%82%d8%b7%d9%8a%d9%81/

September 3, 2019 at 3:31 PM  

Post a Comment

Subscribe to Post Comments [Atom]

<< Home